“Sanderlend” 7 ildən sonra Premyer Liqada!

İngiltərə Çempionşipində pley-off həyəcanı başa çatıb.

90deqiqe.Az xəbər verir ki, “Sanderlend” final qarşılaşmasında “Şeffild Yunayted”i 2:1 hesabı ilə məğlub edərək Premyer Liqaya vəsiqə qazanıb.

Londondakı əfsanəvi “Uembli” stadionunda keçirilən oyunda hesabı 25-ci dəqiqədə “Şeffild Yunayted”in hücumçusu Tayrez Kempbell açıb. “Sanderlend” isə ikinci hissədə oyunun axarını dəyişə bilib – 76-cı dəqiqədə Eliezer Mayenda bərabərlik qolunu vurub. Matçın taleyini isə 90+5-ci dəqiqədə Tom Uotsonun qolu həll edib.

Yarımfinal mərhələsində “Şeffild Yunayted” “Bristol Siti” üzərində ümumi 6:0 hesablı qələbə ilə finala yüksəlmişdi. “Sanderlend” isə “Koventri Siti”yə qarşı iki oyunun nəticəsinə əsasən 3:2 hesabı ilə üstün olmuşdu.

Beləliklə, 2016/17 mövsümündən bəri Premyer Liqadan uzaq qalan “Qara pişiklər” yeddi illik fasilədən sonra elitaya qayıdıb. Qeyd edək ki, cari mövsümdə birbaşa yüksəlmə hüququnu “Lids Yunayted” və “Bernli” klubları qazanıb.