Premyer Liqa "Mançester Siti"nin cəzasını açıqlayıb

İngiltərə Premyer Liqası və “Mançester Siti” rəhbərliyi arasında intizam qaydalarının pozulmasına dair razılıq əldə olunub.

90deqiqe.Az-ın məlumatına görə, 2024/2025 mövsümündə “şəhərlilər”in ümumilikdə 9 oyunda matçın başlanğıcı və ikinci hissəyə vaxtında çıxmamaqla qaydanı pozduğu bildirilib.

Xüsusilə diqqət çəkən məqam odur ki, Pep Qvardiolanın komandası bütün hallarda ikinci hissəyə gecikib. Ən ciddi pozuntu isə dekabr ayında baş tutan “Mançester Yunayted”lə derbidə qeydə alınıb – həmin oyunda “Mançester Siti” həm ilk hissəyə, həm də fasilədən sonra meydançaya gec çıxıb.

Nəticədə klub 1,08 milyon funt-sterlinq (təxminən 1,26 milyon avro) məbləğində cərimələnib.

Qeyd edək ki, “Mançester Siti” ötən mövsüm İngiltərə Premyer Liqasını 3-cü pillədə başa vurub.