Luis Dias “Liverpul”dan gələcəyi ilə bağlı qərar gözləyir

“Liverpul”un cinah hücumçusu Luis Dias yaxın günlərdə klub rəhbərliyi ilə gələcəyi barədə müzakirə aparacaq.

90deqiqe.Az-ın “Sport.es”ə istinadən yaydığı xəbərə görə, 28 yaşlı futbolçu “Liverpul”da qalmağa qarşı deyil. Lakin hazırda komandadakı ən aşağı maaşlı oyunçulardan biri olan kolumbiyalı, klubun ona layiq olduğu dəyəri verməsini istəyir.

O, ya şərtlərinə uyğun yeni müqavilə təklif edilməsini, ya da transferə çıxarılmasını tələb edəcək.

Qeyd olunur ki, yay transfer dönəmində Darvin Nunesin satılması halında, “Liverpul”un eyni vaxtda Diasla da yollarını ayırmağa can atmayacağı gözlənilir. Klub hücumçunu 82 milyon avroya dəyərləndirir.

Kolumbiyalı futbolçuya “Barselona”, “Bavariya” və Səudiyyə Ərəbistanının “Əl-Nəsr” klubu maraq göstərir.