“Liverpul” “Arsenal” üzərində qələbə qazandı

İngiltərə Premyer Liqasının III turunda “Liverpul” doğma meydanda “Arsenal”ı qəbul edib.

90deqiqe.Az-ın məlumatına görə, “Enfild” stadionunda keçirilən qarşılaşma meydan sahiblərinin minimal hesablı qələbəsi ilə yekunlaşıb – 1:0.

Artıq 5-ci dəqiqədə “Arsenal” ciddi itki ilə üzləşib – müdafiəçi Vilyam Saliba zədələnərək meydanı tərk edib, onu Kriştian Moskera əvəzləyib.

Matçın taleyini isə 83-cü dəqiqədə vurulan qol həll edib – Dominik Soboslai cərimə zərbəsindən dəqiq zərbə ilə “Liverpul”a vacib üç xal qazandırıb.

Bu qələbədən sonra “Liverpul” 9 xalla turnir cədvəlinə liderlik edir. “Arsenal” isə 6 xalla 3-cü pillədə qərarlaşıb.

Növbəti turda “Liverpul” sentyabrın 14-də səfərdə “Bernli” ilə qarşılaşacaq, “Arsenal” isə sentyabrın 13-də “Nottingem Forest”i qəbul edəcək.