“Hələ istədiyimiz komanda deyilik, amma addım-addım irəliləyirik”

“Mançester Siti”nin baş məşqçisi Xosep Qvardiola 4-cü tur Premyer Liqa matçında “Mançester Yunayted” üzərində 3:0 hesablı qələbədən sonra fikirlərini bölüşüb.

90deqiqe.Az xəbər verir ki, "BBC" ispan mütəxəssisin fikirlərini belə çatdırıb:

“Belə mövsüm başlanğıcı gözləmirdik və rəqiblərimiz çox güclüdür. Biz onlara yaxın olmaq və titul uğrunda mübarizə aparmaq istəyirik. Komandamız əla döyüş ruhu nümayiş etdirdi, oyunçularımız özləri ilə qürur duyur. Belə xüsusi gündə onlar əllərindən gələni edirlər. Azarkeşlərin sevincini gördük – bu böyük bir üstünlükdür.

Hələ çox şey üzərində işləməliyik. Hələ istədiyimiz komanda deyilik, amma addım-addım irəliləyirik. Bu qələbə bizim üçün çox faydalıdır. Bəzən çox fürsət yaradırıq, bəzən isə alınmır.

“Mançester Yunayted”də əla futbolçular var və ev oyunlarında onlarla çətinlik çəkirik. “Old Trafford”da nəticələrimiz daha yaxşıdır.

Fil Foden möhtəşəm oynadı. O cərimə sahəsinə daxil olmağı sevir və keçən çempionluq mövsümündə Premyer Liqanın ən yaxşı oyunçusu idi. O, bizim üçün çox önəmlidir. Erling Halandın payı da inanılmazdır – iki oyunda yeddi qol vurmaq pis deyil.”