Kukurella "Mançester Siti"yə niyə keçmədi?

"Çelsi"nin sol cinah müdafiəçisi Mark Kukurella bir vaxtlar "Mançester Siti"yə keçməyi düşündüyünü etiraf edib.

90deqiqe.Az xəbər verir ki, jurnalist Fabrisio Romano 27 yaşlı futbolçunun dediklərini belə çatdırıb.

  "Mançester Siti" "Çelsi"yə keçməzdən əvvəl məni transfer etmək istəyirdi. Onlar çox güclü idilər - dünyanın ən yaxşı komandalarından biri. Mən də getmək istəyirdim. Qvardiola səni çağıranda, satılmaq üçün diz çöküb yalvarmağa hazırsan. Amma sonda klublar razılığa gələ bilmədilər"

"Şəhərlilər" ispaniyalı futbolçunu 2022-ci ilin yayında "Brayton"dan "Çelsi"yə keçməzdən əvvəl də transfer etməyə çalışmışdılar.

Mark Kukurellanın transferi "Çelsi"yə 65 milyon avrodan çox başa gəldi. O, hazırda "mavilər"in heyətində 132 oyun keçirib, səkkiz qol vurub və 11 məhsuldar ötürmə edib.