Böyük Britaniya hökuməti Abramoviçə son şans verdi

Böyük Britaniya hökuməti Roman Abramoviçə ona məxsus “Çelsi” klubunun satışından əldə olunan və üç ildən artıqdır dondurulmuş 2,5 milyard funt-sterlinq vəsaitin köçürülməsi ilə bağlı son şans verib.

90deqiqe.Az-ın "The Guardian"a istinadən məlumatına görə, Böyük Britaniyanın maliyyə naziri Reyçel Rivz bu gün vəsaitlərin Ukraynada humanitar məqsədlər üçün nəzərdə tutulmuş yeni fonda köçürülməsinə icazə verib.

Böyük Britaniyanın baş naziri Kir Starmer Abramoviçi vəsaitləri ayırmağa çağırıb və əks halda hökumətə pulların nəhayət blokdan çıxarılmasına imkan verəcək məhkəmə prosesinin başlanacağını bildirib.

“Mesajım Abramoviçə belədir: vaxt gedir. Üzərinizə götürdüyünüz öhdəliyi yerinə yetirin və pulu indi ödəyin. Əks halda, biz məhkəməyə müraciət etməyə hazırıq ki, hər bir qəpik həyatı dağıdılmış insanlara çatsın”, – deyə Kir Starmerin sözlərini "The Guardian" sitat gətirib.

Qeyd edək ki, Roman Abramoviç sanksiyalar səbəbindən 2022-ci ildə “Çelsi” klubunu satmağa məcbur olub. Klubun satışından əldə edilən vəsaitlər dondurulub və Abramoviçin nəzarətində olan Fordstam şirkətinə məxsus bank hesabında saxlanılır.