Kerrik “Mançester Siti” ilə oyun öncəsi hədəfləri açıqladı

“Mançester Yunayted”in baş məşqçisi Maykl Kerrik İngiltərə Premyer Liqasının 22-ci turunda “Mançester Siti”yə qarşı keçiriləcək oyun öncəsi komandasının mövsümün qalan hissəsi üçün hədəflərindən danışıb.

90deqiqe.Az-ın məlumatına görə, mütəxəssis bildirib ki, əsas məqsəd turnir cədvəlinin yuxarı pillələrində yer almaqdır:

“Liderlər sırasında olmaq, turnir cədvəlinə başçılıq etmək istəyirik. Bu, kifayət qədər aydındır. Lakin bu istiqamətdə addım-addım irəliləməliyik. Avrokuboklarda iştirak bizim üçün mühüm mərhələ olacaq. Buna görə də bu yolda hərəkətimizi davam etdirməliyik”, – deyə Kerrik klubun rəsmi saytına açıqlamasında bildirib.

Qeyd edək ki, “Mançester Yunayted” Maykl Kerrikin baş məşqçi təyin olunduğunu yanvarın 13-də açıqlayıb.

Hazırda “qırmızı şeytanlar” Premyer Liqanın turnir cədvəlində 21 oyundan sonra 32 xalla 7-ci pillədə qərarlaşıb. Komandanın 4-cü yerlə xal fərqi üçdür.