Vitor Pereyra İngiltərə Premyer Liqasına qayıdır

“Nottingem Forest” Şon Dayçın istefasından sonra yeni baş məşqçi axtarışlarını davam etdirir.

90deqiqe.Az-ın "Sky Sports"a istinadən məlumata görə, “meşəçilər”in sükanı arxasına Vitor Pereyra keçə bilər. Bildirilir ki, klub rəhbərliyi portuqaliyalı mütəxəssislə danışıqlar aparıb və o, İngiltərə çempionatına qayıtmağa müsbət yanaşır.

57 yaşlı çalışdırıcının son klubu “Vulverhempton” olub. O, həmin komandadan noyabrın əvvəlində ayrılıb. Pereyra karyerası ərzində “Portu”, “Fənərbağça”, “Əl-Şabab”, “Flamenqo”, “Olimpiakos” və digər klublara da rəhbərlik edib.

Qeyd edək ki, “Nottingem Forest” hazırda İngiltərə Premyer Liqasının turnir cədvəlində 27 xalla 17-ci pillədə qərarlaşıb.