“Tevesin “Mançester Siti”yə keçidi çox ağrılı oldu”

“Mançester Yunayted”in sabiq müdafiəçisi Patris Evra, hücumçu Karlo Tevesin “qırmızı şeytanlar”dan “Mançester Siti”yə keçidini xatırlayıb.

90deqiqe.Az xəbər verir ki, "The Athletic" sabiq futbolçunun dediklərini belə çatdırıb.

Evra bildirib ki, bu keçid onun üçün çox ağrılı olub: “Bu çox pis təsir etdi. İnanmaq mümkün deyildi. Bu, Çempionlar Liqasının finalından sonra baş verdi, Teves əsas heyətdə yer almadı. Onun Fergyusonla münaqişəsi vardı. Mən bunu istirahətdə gördüm. Və birdən! Teves “Mançester Siti”yə keçdi. Ona zəng etdim və dedim: ‘Səni öldürəcəm, ayaqlarını sındıracam, Karlito.’ Bu çox ağrılı idi. Çətin idi həzm etmək. Amma məncə, bu, Ser Aleks Fergyusona qarşı bir növ intiqam idi. Ona görə də çox məyus oldum, çünki həqiqəti heç vaxt öyrənə bilmirsən. Biz buna baha qiymət ödədik. Əgər Teves “Siti”yə keçməsəydi, məncə onlar Premyer Liqada qalib gəlməyə başlamazdılar. Özünü xəyanət edilmiş hiss edirsən, amma o hələ də mənim qardaşımdır. Seçiminə hörmət göstərmək lazımdır.”

Qeyd edək ki, Karlo Teves “Mançester Yunayted”də 2007–2009-cu illərdə, “Mançester Siti”də isə 2009–2013-cü illərdə çıxış edib.