Arteta “Bornmut” məğlubiyyətini şərh etdi

“Arsenal” klubunun baş məşqçisi Mikel Arteta İngiltərə Premyer Liqasının 32-ci turunda “Bornmut”a 1:2 hesablı məğlubiyyəti şərh edib.

90deqiqe.Az-ın "BBC"ə istinadən məlumatına görə, mütəxəssis bildirib ki, bu nəticə komanda üçün ciddi zərbə olub və əsas məsələ artıq reaksiyanın necə olacağıdır:

“Məyusluqdur. Bu, sanki üzə vurulan zərbədir. İndi hər şey bizim reaksiyamızdan asılıdır. Bu komanda səbəbsiz yerə 11 oyun məğlub olmamışdı, çox şey düzgün edilib. Amma bu gün effektiv deyildik. Onların ilk təhlükəli hücumu bizim cərimə meydanında bəxtsiz epizod oldu və qol buraxdıq. Belə vəziyyətdən çıxmalıyıq”.

Mütəxəssis ikinci hissədə komandasının oyunundan da narazı qaldığını vurğulayıb: “İkinci hissədə fərqli oyun gözləyirdik. Bu gün çox qəribə səhvlər etdik. Adətən stabil oynayırıq, amma bu dəfə alınmadı. Bu futboldur, belə hallar olur”.

Arteta həmçinin futbolçulara dəstək göstərərək onların vəziyyətini dəyərləndirib: “Futbolçular çox üzgündür və üzgün olmalıdırlar. Bu nəticəni qəbul edib yenidən ayağa qalxmalıdırlar, əks halda mübarizədən kənarda qalarsan. Qarşıda vacib həftə var və çox şeyin taleyi həll olunur. Hələ də hər iki turnirdə yaxşı vəziyyətdəyik”.

Hazırda “Arsenal” 70 xalla turnir cədvəlinin birinci pilləsində qərarlaşıb. “Bornmut” isə 45 xalla 9-cu yerdədir.