“Mançester Siti”dən möhtəşəm geridönüş

İngiltərə Kubokunun yarımfinal mərhələsində “Mançester Siti” ilə “Sauthempton” üz-üzə gəlib.

90deqiqe.Az-ın məlumatına görə, Londonun “Uembli” stadionunda keçirilən qarşılaşma dramatik mübarizə şəraitində keçib və “şəhərlilər”in 2:1 hesablı qələbəsi ilə yekunlaşıb. Oyunu baş hakim Kreyq Pauson idarə edib.

Hesabı matçın 79-cu dəqiqəsində Finn Azaz açaraq “Sauthempton”u önə keçirib. Lakin “Mançester Siti” qısa müddətdə geri dönüş etməyi bacarıb. 83-cü dəqiqədə Jeremi Doku bərabərlik qolunu vurub, 87-ci dəqiqədə isə Niko Qonsales qələbə topuna imza atıb.

Bu nəticə ilə “Mançester Siti” İngiltərə Kubokunun finalına vəsiqə qazanıb. Komanda həlledici görüşdə “Çelsi” – “Lids Yunayted” cütünün qalibi ilə qarşılaşacaq.

Qeyd edək ki, İngiltərə Kubokunun ən titullu komandası “Arsenal”dır – London təmsilçisi bu turniri 14 dəfə qazanıb. İkinci pillədə 13 titul ilə “Mançester Yunayted” qərarlaşıb. “Liverpul”, “Tottenhem” və “Çelsi” isə hərəyə 8 dəfə kuboka sahib çıxıblar.