“Hər şey yenidən "Arsenal"ın əlindədir”

“Arsenal” klubunun sabiq hücumçusu Tyerri Anri İngiltərə Premyer Liqasında çempionluq mübarizəsində “topçular”ın üstünlüyü barədə danışıb.

90deqiqe.Az xəbər verir ki, "Sky Sport" sabiq futbolçunun dediklərini belə çatdırıb.

“İndi hər şey yenidən ‘Arsenal’ın əlindədir. Artıq “Mançester Siti”nin yox. ‘Siti’nin ‘Everton’la oyunda xal itirə biləcəyini təsəvvür edirdim. Amma ‘Arsenal’ın ‘Vest Hem’lə oyunu məni narahat edir. Tələsmək və vaxtından əvvəl sevinmək istəmirəm, çünki titul hələ qazanılmayıb. ‘Siti’nin oyununda müəyyən gərginlik hiss etdim. Onlar səhvlərə yol verərək ‘Everton’u yenidən oyuna qaytardılar. ‘Arsenal’ görür ki, ‘Mançester Siti’ xal itirib, amma ‘bəlkə də’ kimi düşünmək olmaz. Burada ‘bəlkə’ yoxdur. Sadəcə öz oyunlarınızı qazanın. ‘Siti’yə baxmayın. Hər şey sizin öz əlinizdədir” deyə o qeyd edib.

Qeyd edək ki, “Arsenal” 35 oyundan sonra 76 xalla turnir cədvəlinin zirvəsində qərarlaşıb. Bir oyun az keçirən “Mançester Siti” isə 71 xalla ikinci pillədədir.