Co Kol “Çelsi”yə Levandovski və Stounzu məsləhət gördü

“Çelsi”nin sabiq yarımmüdafiəçisi Co Kol London klubunun yay transfer dövründə hansı futbolçuları heyətə qatmalı olduğunu açıqlayıb.

90deqiqe.Az-ın məlumatına görə, o, “Football London”a verdiyi müsahibədə bildirib ki, hazırda “Çelsi”nin maliyyə vəziyyətinin necə olduğu dəqiq bilinmir, lakin hər zaman azad agent statusunda olan futbolçularla müqavilə bağlamaq mümkündür.

Keçmiş futbolçu qeyd edib ki, yayda Robert Levandovski və Con Stounz kimi təcrübəli oyunçuların transferi də nəzərdən keçirilə bilər. Onun sözlərinə görə, bu futbolçular hər oyunda tam 90 dəqiqə çıxış etməsələr də, qələbə mentalitetinə sahibdirlər.

“Onlar klub mədəniyyətinin nə olduğunu yaxşı bilirlər və həm meydanda, həm də paltardəyişmə otağında komandaya kömək edə bilərlər”, – deyə Co Kol əlavə edib.

Xatırladaq ki, “Çelsi” bu mövsüm İngiltərə çempionatını yalnız 10-cu pillədə başa vurub və növbəti mövsüm avrokuboklardan kənarda qalıb. London klubuna yeni baş məşqçi Xabi Alonso təyin olunub.