"Reşfordun qayıdışı həm klub, həm də özü üçün doğru qərar olmalıdır"

"Mançester Yunayted"in müdafiəçisi Harri Maquayr hücumçu Markus Reşfordun komandaya mümkün qayıdışı ilə bağlı fikirlərini bölüşüb.

90deqiqe.Az-ın məlumatına görə, təcrübəli futbolçu bildirib ki, Reşfordla uzun illərə söykənən yaxşı münasibətləri var və onun hansı səviyyəli oyunçu olduğunu hər kəs bilir.

"Markusla münasibətlərim çox yaxşıdır və illər ərzində birlikdə çox gözəl anlar yaşamışıq. Onun necə yüksək səviyyəli futbolçu olduğunu bilirəm. Düşünürəm ki, burada əsas məsələ klubla Markusun hər iki tərəfi qane edəcək qərara gəlməsidir.

Əlbəttə, Markus geri qayıtsa, onun oynamasını, xoşbəxt və özünəinamlı olmasını istəyərik. Bu qərar həm onun, həm də klub üçün doğru olmalıdır. Hər kəs bilir ki, Markus gələn mövsüm çıxış edəcəyi istənilən komanda üçün çox dəyərli futbolçu ola bilər", - deyə Harri Maquayr bildirib.

Markus Reşford 2025/2026 mövsümündə "Barselona"nın heyətində bütün turnirlərdə 49 oyuna çıxıb, 14 qol vurub və 14 məhsuldar ötürmə edib.

Hücumçunun "Mançester Yunayted"lə müqaviləsi 2028-ci il iyunun 30-dək qüvvədədir.