“Arsenal” İngiltərə Superkubokunun qalibi oldu

İngiltərə Superkubokunda 2026-cı ilin qalibi müəyyənləşib.

90deqiqe.Az-ın məlumatına görə, final xarakterli qarşılaşmada “Arsenal” və “Mançester Siti” komandaları üz-üzə gəlib. Kardiffdəki “Principality” stadionunda keçirilən matç London təmsilçisinin 3:0 hesablı qələbəsi ilə başa çatıb.

“Arsenal” ilk dəqiqədə hesabı açıb. Rikardo Kalafyori 1-ci dəqiqədə fərqlənərək komandasını önə keçirib.

28-ci dəqiqədə Kay Haverts “topçular”ın üstünlüyünü iki topa çatdırıb. İkinci hissənin əvvəlində – 48-ci dəqiqədə Martin Edeqor üçüncü qolu vuraraq görüşün yekun nəticəsini müəyyənləşdirib.

Qeyd edək ki, İngiltərə Superkubokunda əvvəlki mövsümün Premyer Liqa çempionu ilə ölkə kubokunun qalibi qarşılaşır.

“Arsenal” 2025/2026 mövsümündə Premyer Liqanın qalibi olub. London klubu 38 oyunda 85 xal toplayıb. Komanda UEFA Çempionlar Liqasında da finala yüksəlib, lakin həlledici görüşdə PSJ-yə penaltilər seriyasında uduzub – 1:1 (3:4).

“Mançester Siti” isə ötən mövsüm İngiltərə çempionatını 78 xalla ikinci pillədə başa vurub. “Şəhərlilər” eyni zamanda 2025/2026 mövsümündə İngiltərə Kubokunun qalibi olublar.