“Son iki ili 10 günə dəyişmək mümkün deyil” -

“Tottenhem”in baş məşqçisi Roberto De Zerbi komandasının İngiltərə Premyer Liqasının II turunda “Nyukasl”a 0:2 hesabı ilə məğlub olmasını şərh edib.

90deqiqe.Az-ın məlumatına görə, italiyalı mütəxəssis qarşılaşmanın böyük hissəsində komandasının rəqibdən üstün oynadığını bildirib:

“Düşünürəm ki, 60-65 dəqiqə ərzində “Nyukasl”dan daha yaxşı oynadıq. Qol vurmaq şansımız oldu, amma bundan yararlana bilmədik. Rəqib hesabı açdıqdan sonra xətlər arasındakı məsafəni əvvəlki kimi qoruya bilmədik”.

De Zerbi komandanın hələ tam formalaşmadığını vurğulayıb:

“Daha çox qol vəziyyətimiz oldu və qapıya daha çox zərbə endirdik. Amma biz hələ komanda deyilik. Bir neçə məqamı yaxşılaşdırmalıyıq. Nəticəni unudun. Mən əsəbi deyiləm, yaxşı işləyirik. Bu gün xüsusilə nəticə baxımından bəxtimiz gətirmədi”.

Baş məşqçi “Tottenhem”də panikanın olmadığını və dəyişikliklər üçün zamana ehtiyac duyulduğunu qeyd edib:

“Panikaya düşmürük. Hara getdiyimizi bilirəm. Planı bilirəm və qarşılaşacağımız çətinlikləri başa düşürəm. Nəticəyə görə azarkeşlərə və futbolçulara görə təəssüf edirəm, amma daha yaxşı olmalıyıq. Son iki ildə baş verənləri 10 günə və ya bir transfer pəncərəsinə dəyişmək mümkün deyil”.

De Zerbi ötən mövsümün komanda üçün nə qədər çətin keçdiyini də xatırladıb:

“Ötən mövsüm Çempionşipə düşməyə yaxın idik. Birlikdə komandanın liqada qalmasını təmin etdik. İndi isə sakitliyimizi qorumalıyıq”.

Qeyd edək ki, “Nyukasl”a məğlubiyyətdən sonra “Tottenhem” ilk iki turda xal qazana bilməyib və turnir cədvəlinin sonuncu pilləsində qərarlaşıb.