“Arsenal”ın sabiq idman direktoru “Nottingem Forest”dən ayrıldı

“Arsenal”ın sabiq idman direktoru Edu “Nottingem Forest” klubundan ayrılıb.

90deqiqe.Az-ın “Goal”a istinadən məlumatına görə, 48 yaşlı braziliyalı mütəxəssislə müqaviləyə qarşılıqlı razılaşma əsasında xitam verilib.

Edu bir ildən bir qədər əvvəl “Nottingem Forest”ə futbol istiqaməti üzrə qlobal rəhbər vəzifəsində qoşulmuşdu. Lakin son aylarda onun klubdakı fəaliyyəti faktiki olaraq dayanıb. Braziliyalı mütəxəssis fevral ayından komandanın oyunlarında iştirak etməyib, martın əvvəlindən isə stadionda və məşq bazasında görünməyib.

Edu transfer siyasətinə görə tənqidlərə məruz qalıb. Böyük məbləğlər xərclənməsinə baxmayaraq, Omari Hatçinson, Duqlas Luiz və Aleksandr Zinçenko kimi futbolçular komandanın çıxışına ciddi təsir göstərə bilməyiblər.

“Nottingem Forest” Edu üçün birbaşa əvəzləyici təyin etməyi planlaşdırmır. Onun klubdan kənarlaşdırılmasından sonra futbol direktoru Corc Sirianosun səlahiyyətləri genişləndirilib.

Qeyd edək ki, Edu “Nottingem Forest”ə keçməzdən əvvəl “Arsenal”da çalışıb. O, 2022-ci ildən London klubunda idman direktoru vəzifəsini tutub.