Emeridən Qarnaço ilə bağlı açıqlama

“Aston Villa”nın baş məşqçisi Unai Emeri komandanın “Çelsi”dən icarəyə götürdüyü Alexandro Qarnaçonun hələ ən yaxşı formasına çatmadığını bildirib.

90deqiqe.Az-ın məlumatına görə, ispaniyalı mütəxəssis argentinalı futbolçunun gündən-günə inkişaf etdiyini və onun münasibətindən razı qaldığını deyib.

“Əvvəla, onun işə münasibəti müsbət məqamdır. Hazırkı yanaşması çox vacibdir. O, lazımi fədakarlığı göstərir. İndi ona vaxt lazımdır. Vaxt və hər gün göstərilən gərgin iş. O, münasibəti ilə bunu nümayiş etdirir”, - deyə Emeri BBC-yə açıqlamasında bildirib.

Baş məşqçi Qarnaçonun tədricən daha yaxşı vəziyyətə gəldiyini vurğulayıb:

“Tədricən onun daha yaxşı olduğunu görürəm. Ən vacib məsələ sabitliyi və tələbkarlığı qorumaq, eyni münasibətlə çalışmağa davam etməkdir”.

22 yaşlı argentinalı futbolçu bu mövsüm “Aston Villa”nın heyətində cəmi 31 dəqiqə meydanda olub. Emeri hələlik ona klubun yetirməsi Corc Hemminqsi üstün tutur.

Qeyd edək ki, Qarnaço çərşənbə axşamı UEFA Çempionlar Liqasında “Brügge”yə qarşı keçirilən və “Aston Villa”nın 3:2 hesablı qələbəsi ilə başa çatan görüşdə ehtiyat oyunçular skamyasında qalıb və meydana çıxmayıb.