“Yoro özünü qınamamalıdır”

“Mançester Yunayted”in baş məşqçisi Maykl Karrik İngiltərə Premyer Liqasının 8-ci turunda “Bornmut”a evdə 0:3 hesabı ilə məğlubiyyəti şərh edib.  

90deqiqe.Az-ın “Sky Sports”a istinadən məlumatına görə, o, gənc müdafiəçi Leni Yoronu müdafiə edərək futbolçunun səhvinin bəxtsizlikdən qaynaqlandığını bildirib.

“Qollardan birində Leni Yoro sadəcə meydançada sürüşdü. Digər qol isə Eyden Hevenə qarşı verilən olduqca mübahisəli cərimə zərbəsindən sonra vuruldu. Düşünmürəm ki, rəqib futbolçu qayda pozuntusunun qeydə alınmasını tələb edəcək qədər ona yaxın olub.

Leninin sürüşməsi xoşagəlməz bəxtsizlik idi. Onun böyük gələcəyi var, inanılmaz istedada malik müdafiəçidir. Bəli, o, səhvə yol verib və hazırda buna görə məyusdur, amma özünü qınamamalıdır. Səhvlər olur. Üstəlik, bu, texniki səhv də deyildi, sadəcə müvazinətini itirdi.

Üçüncü qola gəlincə, ikinci hissədə azarkeşlər komandamızın oyunun gedişatını dəyişəcəyinə ürəkdən inanırdılar. Heç olmasa, bir qol vurmaq üçün fürsətimiz olsaydı, stadion bizi irəli aparardı. Lakin oyunun taleyini dəyişəcək məqamı tapa bilmədik. “Bornmut”un üçüncü qolu isə komandamız üçün sarsıdıcı oldu. Həmin qoldan sonra oyun, demək olar ki, başa çatmışdı.

Qarışıq hisslər keçirirəm. Matçı belə başa vurmaq çox üzücüdür”, — deyə Karrik bildirib.