Venger sonuncu örnək idi – Mourinyo

"Totenhem"in çalışdırıcısı Joze Mourinyo "Arsenal"ın sabiq baş məşqçisi Unai Emerinin istefaya göndərilməsinə münasibət bildirib.

Corner.az Britaniya mətbuatına istinadən xəbər verir ki, 52 yaşlı mütəxəssis Premyer Liqada son  zamanlar məşqçilərin vəzifələrində qalmalarının çətinləşdiyini deyib: "20 il bir komandanı çalışdırmaq? Bunun mümkün olduğunu sanmıram. Müasir həyat tərzi, yeni baş məşqçilər və sosial media deyərkən artıq hər şeyin təsir yaratdığını düşünürəm. İnsanların zehni dəyişib. Münasibətlər daha sürətlə bitir. Tez yoruluruq. Bu saydıqlarım sadəcə futbolu deyil, dünyanı və yanaşma tərzini dəyişdirir. Məncə, Arsen Venger bir komanda ilə xeyli müddət işləyən mütəxəssislərin son örnəyi idi. Bu, bizim üçün pis bir şeydir. Mən bu komandayla illərlə davam edərəm dediyimiz günlər geridə qaldı. Hər gün işimiz üçün mübarizə aparmalıyıq".