İspaniya La Liqasının 27-ci turunda autsayder "Hueska"nı 4:1 hesabıyla yenən "Barselona"nın hücumçusu Lionel Messi dublla yadda qalıb.
Corner.az xəbər verir ki, bununla cari mövsümdə çempionatda vurduğu qolların sayını 21-ə çatdıran argentinalı bombardirlər sırasında liderliyini möhkəmlədib.
Argentinalı futbolçu yeni rekord da müəyyənləşdirib. Belə ki, Messi La Liqa tarixində ardıcıl olaraq 13 mövsümdə 20 qol həddini keçən ilk futbolçu kimi tarixə düşüb.
Bu oyun həm də Lionelin İspaniya elitasında 767-ci matçı olub. O, Kataloniya təmsilçisinin formasıyla çıxdığı rəsmi oyun sayına görə hazırda Qətər "Əl-Sədd"ini çalışdıran Xaviyə çatıb.
