Bütün dünya epizodun penalti olduğunu gördü - Kuman

“Barselona”nın baş məşqçisi Ronald Kuman La Liqanın 30-cu turunda “Real”a məğlub olduqları matç haqqında fikirlərini açıqlayıb.

Corner.az xəbər verir ki, AS nəşrinə danışan niderlanlı mütəxəssis, 1:2 hesabıyla bitən görüşlə bağlı bunları deyib:

“Oyuna baxıb, “Barselona”nı dəstəkləyirsənsə, hakimin qərarlarından narazı qalacaqsan. Düzü, ilk hissədə müdafiədə və hücumda yaxşı çıxış edə bilmədik. İkinci hissəyə yaxşı başladıq. Lakin hakim bəzi epizodlarda düzgün qərar vermədi. Martin Breytveytin epizodunda penalti var idi. Hakim daha düzgün anlamaq üçün əlavə vaxt alıb, VAR-a baxmalı idi. Lakin VAR-ın nə üçün İspaniyada işləmədiyini bilmirəm. Bütün dünya epizodun penalti olduğunu gördü”.