Barselona üçün ən doğru namizəd Xavidir - Qvardiola

"Mançester Siti”nin baş məşqçisi Pep Qvardiola “Barselona” klubu haqda açıqlama verib.

Corner.az xarici mətbuata istinadən xəbər verir ki, 50 yaşlı ispan mütəxəssis, Kataloniya təmsilçisinin istefaya göndərdiyi baş məşqçi Ronald Kumanla bağlı bunları deyib:

“Kuman və mən məşqçilik karyeramızın oyunların nəticələrindən asılı olduğunu bilirik. Yaxşı nəticə olmazsa, heç kim işinə davam edə bilməz. Nə mən, nə də Kuman. Kumana bundan sonrakı karyerasında uğurlar arzulayıram ”.

Qvardiola, hazırda Qətərin “Əl Sədd” komandasının baş məşqçisi olan Xavinin “Barselona”ya baş məşqçi təyin oluna biləcəyini vurğulayıb:

“Barselona” üçün ən doğru namizəd Xavidir. Buna inanıram. Nələr olacağını bilmirəm. Amma Xavi gəlsə, bu işi sevə-sevə görəcəyindən əminəm. Onun yaxşı futbol zəkası var. Mən “Barselona”nı çalışdıranda heç Xavi qədər təcrübəm yox idi”.