Barselona Xavini yeni baş məşqçi kimi təqdim etdi

İspaniyanın “Barselona” klubu yeni baş məşqçisi Xavi Ernandesi təqdim edib.

Corner.az klubun mətbuat xidmətinə istinadən xəbər verir ki, təqdimat “Kamp Nou” stadionunda baş tutub.

41 yaşlı mütəxəssis Kataloniya təmsilçisi ilə 2024-cü ilin yayınadək müqavilə imzalayıb.

Xavi təqdimat mərasimində bunları söyləyib: “Bu, bir yuxunun  gerçək olmasıdır. 2015-ci ildən buraya dönməyi xəyal edirdim. Artıq bu, xəyal deyil, gerçəkdi. Çox çalışmağımız lazımdır. Dərhal işə başlamaq istəyirəm. “Barselona” mənim evim olsa da, hansı məsuliyyəti üzərimə aldığımın fərqindəyəm. Çətin bir dövrdə gəldim, amma buna hazır olduğumu düşünürəm. Bu mənada ən böyük üstünlüyüm bu klubu yaxından tanımağımdır. “Barselona”nın çemponluqlar uğrunda mübarizəyə qoşulması üçün hamımız bir hədəf uğrunda birləşməliyik”.

2015-2019-cu illərdə Qətər “Əl-Sədd”ində oynayan keçmiş yarımmüdafiəçi 2019-cu ildə bu komandaya baş məşqçi təyin olunmuşdu. Onun bu klubla 2023-cü ilə qədər müqaviləsi olsa da, “Barselona” 5 milyon avro təzminat ödəməklə sabiq oyunçusunu baş məşqçi postuna gətirdi.