İspaniya La Liqasının 21-ci turu çərçivəsində baş tutan “Atletik”lə səfər oyunu “Real”ın hücumçusu Kərim Benzama üçün əlamətdar olub.
Corner.az xəbər verir ki, 34 yaşlı hücumçu bu oyunda dubl edərək 2021-ci ildə vurulan qol sayında İngiltərənin “Mançester Yunayted” klbunda çıxış edən Kriştiano Ronaldonu üstələyib.
Fransalı forvard 2021-ci ildə 47 dəfə fərqlənib. Hazırda Ronaldonun aktivində 46 qol var.
Bu göstəricidə Almaniya "Bavariya"sının hücumçusu Robert Levandovski (69 qol) liderdir. İkinci və üçüncü pillələri hərəyə 49 qolla Fransa PSJ-sinin forvardı Kilian Mbappe və Almaniyanın "Borussiya" (Dortmund) klubunun futbolçusu Erlinq Haland bölüşür.
Benzema karyerası ərzində vurduğu qolların sayını da 401-ə çatdırıb. Bununla da o, ən məhsuldar fransız futbolçular arasında ikinci pilləyə yüksəlib. İndiyə qədər yalnız Tyerri Anri Benzemadan daha çox qol vurmağa nail olub – 411. Lakin Kərimin bu mövsümün gedişində Anrini geridə qoyub mütləq rekordçuya çevrilməsi də mümkündür.
Qeyd edək ki, Kərim Benzema cari mövsüm La Liqada 18 matçda meydanda olub, 15 qol və 7 məhsuldar ötürmə ilə yadda qalıb.
