İspaniya Superkubokunda dəyişiklik - RƏSMİ

İspaniya kuboku və superkubokunun formatı dəyişdiriləcək.

Corner.az-ın yerli federasiyanın rəsmi saytına istinadən yaydığı xəbərə görə, 2020-2021 mövsümündən etibarən Superkubok hər ilin yanvar ayında "Dördlər finalı" formatında keçiriləcək. İdeyanı qurumun prezidenti Luis Rubiales irəli sürüb. Yeni qaydalara əsasən, yarışda ölkə kubokunun 2 finalçısı və La Liqanın ən yaxşı iki komandası mübarizə aparacaq. Əgər finalçılarla ən yaxşılar üst-üstə düşərsə, bu zaman kubokun yarımfinalçıları "Dördlər finalı"nda oynamaq hüququ qazanacaqlar. Superkubokun daha bir özəlliyi odur ki, yarış İspaniyada deyil, ölkə xaricində keçiriləcək.

Kubokda gözlənilən dəyişiklik isə ondan ibarətdir ki, burada yarımfinal mərhələsinə qədər oyunlar 2 deyil, 1 matçdan ibarət olacaq. Komandalar mübarizəyə birinci mərhələdən başlayacaqlar. Yalnız Superkubokun iştirakçıları yarışa 1/16 final mərhələsindən qoşulacaqlar. Daha aşağı liqa təmsilçiləri matçları evində keçirəcək.

İspaniya Futbol Federasiya Baş Assambleyasının yaxın vaxtlarda sözügedən dəyişikliyi təsdiqləyəcəyi gözlənilir.