Barselona'nın futbolçusu yeni rekorda imza atdı

İspaniyanın "Barselona" klubunun futbolçusu Xordi Alba yeni rekorda imza atıb.

Corner.az "Opta" nəşrinə istinadən xəbər verir ki, 33 yaşlı müdafiəçi buna "Malyorka"ya 2:1 hesabı ilə qalib gəldikləri La Liqanın 34-cü tur oyununda nail olub.

Komandasının ilk qolunda məhsuldar ötürmə ilə yadda qalan ispan futbolçu cari mövsüm 9-cu assistini edib. Bu, son 10 ildə Kataloniya təmsilçisinin arxa xətt oyunçuları üçün rekord göstəricidir.

"Barselona" tarixində bir mövsümdə daha çox məhsuldar ötürmə verən müdafiəçi isə Daniel Alveşdir. Braziliyalı futbolçu 2011/2012 mövsümündə 11 dəfə buna müvəffəq olub.