“Yaxşı oyun idi, gərgin, təzyiqli, amma rəqib zamanın yalnız 40 faizinə nəzarət etdi”. Corner.az xəbər verir ki, bunu İspaniya kubokunun yarımfinal mərhələsinin ilk görüşündə “Barselona”ya uduzan Madrid “Real”ının baş məşqçisi Karlo Ançelotti deyib.
İtalyan çalışdırıcı rəqibin bu oyunda qələbəyə layiq olmadığını bildirib: “Rəqibin müdafiəsi çox sıx idi. Oyun göstərmək istədiyimiz oyuna bənzəyirdi. Bunu Barselonada da təkrarlamalıyıq. Oyundan razıyıq, amma biz bu matçı təkrarlamalıyıq. “Barselona” bugünkü qələbəyə layiq deyildi, bu, göz qabağındadır. Bu intensivliyi təkrarlasaq, şansımız olacaq”.
“Barselona”nın baş məşqçisi Xavi isə ilk qarşılaşmada qalib gəlsələr də, cütün favoriti “Real” olduğunu vurğulayıb: “Cavab oyununda üstünlüyümüz var, amma yenə də yaxşı çıxış etməliyik. Məncə, “Real” çox güclüdür və mən hələ də onları favorit hesab edirəm. Fiziki cəhətdən güclüdürlər və əla komandaya malikdirlər. Onlar Çempionlar Liqasının qalib olub. Böyük komandalara həmişə hakim ola bilməzsən”.
Xatırladaq ki, “Barselona” ilk yarımfinal oyununda səfərdə “Real”ı 1:0 hesabı ilə məğlub edib.
