“Real”ın hücumçusu Eden Hazard uzun fasilədən sonra yaşıl meydanlara qayıdıb. Corner.az xəbər verir ki, 32 yaşlı oyunçu İspaniya La Liqasının 27-ci turunun “Valyadolid”lə matçının 65-ci dəqiqəsində Kərim Benzemanı əvəzləyib.
Beləcə, uzun müddət idi zədədən əziyyət çəkən belçikalı oyunçu 204 gün sonra yaşıl meydanlara qayıdıb. O, bundan əvvəlki son rəsmi matçına 2022-ci ilin sentyabrında çıxmışdı.
“Real”ın azarkeşləri bu mövsüm cəmi 7 oyuna çıxan və 296 dəqiqə meydanda olan Hazardı bu matçda fitə basıblar. Buna baxmayaraq, o, komandasının 90+2-ci dəqiqədə vurduğu 6-cı qolda məhsuldar ötürmə müəllifi olub. Lukas Vaskesin adını tabloya yazdırmasına şərait yaradan Hazard bu mövsüm 2-ci assistini edib. Onun hesabında 1 qol da var.
