“Barselona” İspaniya La Liqasının 28-ci turunda “Jirona” ilə heç-heçə edib. Corner.az xəbər verir ki, sözügedən matçda Kataloniya təmsilçisi cari mövsümdə ölkə çempionatında 21-ci oyununda qapısında top görməyib.
31 yaşlı qolkiper Mark-Andre ter Ştegen klub rekordunu təkrarlamaq üçün mövsümün sonuna qədər daha 3 oyunda qapısında top görməməlidir.
“Barsa”nın La Liqadakı rekordu 1986/87 mövsümündə 24 “quru oyun” olub. Həmin vaxt qapını Andoni Subisarreta qoruyub. 2014/15 mövsümündə isə Klaudio Bravo 23 görüşdə qapısında qol görməyib.
Katalonlar hazırda İspaniya La Liqasının turnir cədvəlində 72 xalla birinci yerdədir.
