"Peres, "Real" üçün əla liderdir, amma... "

La Liqanın prezidenti Xavyer Tebas Florentino Peresin "Real Madrid"in prezidenti postundakı fəaliyyəti ilə bağlı fikirlərini bölüşüb.

90deqiqe.az xəbər verir ki, funksioner, Peresin "kral klubu" üçün əla lider olduğunu bildirib.

“Real Madrid”in maliyyə problemi yoxdur. Florentino bu klub üçün əla liderdir, amma digər layihələr üçün deyil. “Real Madrid”in prezidenti kimi ona doqquz xal verirəm, amma Superliqanın və digər yarışların rəhbəri kimi ona sıfır xal verirəm”, – Tebasın sözlərini Mundo Deportivo sitat gətirib.

Xatırladaq ki, Peres Avropa Super Liqası layihəsini açıq şəkildə dəstəkləyən azsaylı klub prezidentlərindən biridir. Bundan əlavə, "Real Madrid"in rəhbəri daha əvvəl bildirmişdi ki, o, bir sıra Avropa klubları ilə uğurla danışıqlar aparıb, nəticədə onlar UEFA və FİFA-nın yurisdiksiyasından kənarda fəaliyyət göstərən yeni futbol layihəsinin bir hissəsi olmağa razılaşıblar.