Rakitiç "Barselona" ilə "Real"ı müqayisə etdi

"Əl-Şəbab"ın yarımmüdafiəçisi İvan Rakitiç "Real" və "Barselona"nı müqayisə edib.

90deqiqe.Az xəbər verir ki, xorvat futbolçu sabiq komandasının zəif çıxışının onu incitdiyini bildirib.

"Barsa" altı ildir mənim evimdir, ona görə də onları çox izləyirəm və onların əziyyət çəkdiyini görmək məni incidir. Xavi futbolu hər birimizdən daha yaxşı başa düşən biridir, inşallah o, fərq yarada bilər, xüsusən də nəticələr bəzilərinin dediyi kimi fəlakətli olmadığı üçün. Klub da ağır iqtisadi vəziyyətlə üzləşib. Əsas fərq odur ki, “Real” təcrübəli oyunçuları saxlamaqla nəsil dəyişikliyini rəvan həyata keçirə bilib. B"arsa" bu mənada çox sürətli hərəkət etdi. İnanıram ki, Pedri, Qavi və başqaları klubun gələcəyidir. Ancaq yaşlı oyunçuların köməyi onlara zərər verməyəcək. Düşünürəm ki, Bellinqhem, Kamavinqa və başqaları təcrübəli futbolçulardan çox faydalanırlar.Ümid edirəm ki, "Barselona" yenidən parlaya bilər”

Xatırladaq ki, Rakitiç 2014-2020-ci illərdə "Barselona"da çıxış edib. Bu müddət ərzində xorvatiyalı futbolçu bütün turnirlərdə 310 matçda iştirak edib, 35 qol vurub və 42 məhsuldar ötürmə edib.

La Liqada 28 oyundan sonra 61 xalı olan "Barselona" hazırda ikinci pillədə qərarlaşıb.