"Raul La Liqa və ya Bundesliqa klubunda çalışa bilər"

Məşhur sabiq hücumçusu Ruud van Nistelroy "Real Madrid"in və İspaniya millisinin sabiq hücumçusu Raul Qonzalesin məşqçilik karyerasından danışıb.

90deqiqe.Az xəbər verir ki, 47 yaşlı keçmiş futbolçu Raulun yaxın zamanda La Liqa və ya Bundesliqa klubunda çalışa biləcəyini bildirib.

“Mən Raulla ünsiyyət qururam, onunla görüşdük. O, artıq beş ili "Real Madrid"in ikinci komandasında keçirib, məncə, onun daha yüksək səviyyədə işləməsinin vaxtı çatıb. Bu ciddi mütəxəssisdir. Mənə elə gəlir ki, o, tezliklə La Liqa və ya Bundesliqa klubunda çalışmağa başlayacaq”, – “Marca” qəzeti hollandiyalının sözlərini yazır.

Xatırladaq ki, Qonzales 2019-cu ilin yayından "Real Madrid"in ikinci komandasının baş məşqçisidir. Komanda İspaniya futbolunun üçüncü divizionunda çıxış edir.