Simeone "Real"la derbi hazırlığından danışıb

"Atletiko Madrid"in baş məşqçisi Dieqo Simeone komandanın Madrid derbisinə hazırlığı ilə bağlı fikirlərini bölüşüb.

90deqiqe.Az xəbər verir ki, “AS” nəşri argentinalı çalışdırıcının dediklərini belə çatdırıb:

“Bizim işimizlə birbaşa əlaqəsi olmayan hər şeydən özümü mücərrədləşdirməyə çalışıram. Bütün diqqətimi matça hazırlamağa, futbolçuların vəziyyətini təhlil etməyə və oyun konsepsiyamızı necə təkmilləşdirəcəyimizi düşünməyə cəmləşmişəm. Ətrafımda müzakirə olunanlara və deyilənlərə əhəmiyyət vermirəm, çünki bunun şounun bir hissəsi olduğunu başa düşürəm - matçı, derbini, xüsusən də belə istedadlı oyunçularla təbliğ etməliyik. Bununla belə, bizim, məşqçilər və futbolçular üçün əsas diqqəti öz üzərimizə düşən tapşırıqlara yönəltməkdir”

Xatırladaq ki, bu gün, sentyabrın 29-da Simeonenin komandası La Liqanın 8-ci turu çərçivəsində “Real Madrid”lə qarşılaşacaq.