“MLS-də oynamaq maraqlı olardı”

Madrid “Real”ının müdafiəçisi Dani Karvaxal gələcəkdə MLS-də çıxış edə biləcəyini bildirib.

90deqiqe.Az xəbər verir ki, "Marca" ispaniyalı futbolçunun dediklərini belə çatdırıb.

“Yəqin ki, əvvəlki müsahibələrimdə də demişəm – başqa bir liqada özümü sınamaq istərdim. Bu, ya Madrid klubunu tərk etdiyim zaman, ya da klubla qarşılıqlı şəkildə əməkdaşlığa son verdiyimiz vaxt baş verə bilər,” – deyə Karvaxal vurğulayıb.

Təcrübəli oyunçu əlavə edib ki, Avropadan kənar bir çempionata keçmək variantlardan biridir: “Belə bir halda Avropadan kənarda başqa bir yerdə oynamaq ehtimalım da var. MLS – bu seçimlərdən biridir.”

Qeyd edək ki, Dani Karvaxal “Real”ın yetirməsidir və uzun illərdir klubun əsas heyətində çıxış edir. Onun MLS-ə keçidi “kral klubu” ilə vidalaşdığı halda gündəmə gələ bilər.

Yenicə başa çatan mövsümdə Karvaxal 10 matçda meydana çıxıb, 1 qol vurub və 1 məhsuldar ötürmə verib. 33 yaşlı müdafiəçi çarpaz bağ zədəsi səbəbindən əksər oyunları buraxıb.