Vaskes özünə klub axtarır

Madrid “Real”ının sabiq futbolçusu Lukas Vaskes azad agent statusunda yeni klub axtarışlarını davam etdirir.

90deqiqe.Az-ın “Diario”ya istinadən verdiyi məlumata görə, Vaskesə həm yerli, həm də xarici klublardan maraq var. Lakin futbolçu karyerasını La Liqadan kənarda davam etdirmək niyyətindədir. Məlumata əsasən, Vaskes “Real”a qarşı oynamaq istəmir və bu səbəbdən ölkə xaricindən gələn təklifləri prioritet hesab edir.

34 yaşlı müdafiəçi ilə müqavilənin müddəti başa çatıb və tərəflər əməkdaşlığın yenilənməməsi barədə qərar veriblər.

Lukas Vaskes “Real Madrid”in əsas komandasında 402 matçda forma geyinib. O, klub tarixində yalnız bir mövsüm – 2014/15-ci illər aralığında “Espanyol”da icarə əsasında çıxış etmiş, daha sonra yenidən “Santyaqo Bernabeu”ya qayıtmışdı. Vaskes bu illər ərzində “Real”la bir çox titul və kubokların qazanılmasında pay sahibi olub.