Lamin Yamal ikinci dəfə “Raymon Kopa” mükafatına layiq görüldü

“Barselona”nın gənc vingeri Lamin Yamal mövsümün ən yaxşı 21 yaşadək futbolçusuna verilən “Raymon Kopa” mükafatını qazanıb. 

90deqiqe.Az xəbər verir ki, Yamal həm də bu il “Qızıl top” mükafatının əsas favoritlərindən biri sayılır. Mərasimdən sonra hücumçunun Parisdə şəxsi əyləncə gecəsi təşkil edəcəyi gözlənilir, lakin tədbirin təfərrüatları açıqlanmır.

İspaniyalı futbolçu bu mükafata ikinci dəfə sahib çıxır – o, 2024-cü ildə də qalib olmuşdu.

Geridə qalan mövsümdə 17 yaşlı futbolçu “Barselona” və İspaniya millisinin heyətində 58 oyuna çıxaraq 18 qol vurub, 25 məhsuldar ötürmə ilə yadda qalıb. O, “Barselona” ilə La Liqa, İspaniya Kuboku və Superkubokunu qazanıb, həmçinin kataloniyalılarla Çempionlar Liqasının yarımfinalına qədər irəliləyib.