İspaniyalı futbolçu hakimi təhqirə görə 7 oyunluq cəzalandırıldı

İspaniya La Liqasının 32-ci turunun yekunlarına əsasən “Rayo Valyekano”nun hücumçusu İsi Palason 7 oyunluq cəzaya məruz qalıb.

90deqiqe.Az-ın məlumatına görə, bu barədə İspaniya Futbol Federasiyasının mətbuat xidməti məlumat yayıb. Cəzanın səbəbi hakimi təhqir etməsidir.

Madrid şəhərində “Real Sosyedad”a qarşı keçirilən oyunda Palason artıq əvəzləndikdən sonra hakim qərarına etiraz əlaməti olaraq meydana daxil olub və daha sonra referini “alçaq” adlandırıb.

Qərara əsasən, futbolçu 4 oyunu hakimi təhqir etdiyinə görə, 2 oyunu qərarla razılaşmamağa görə, daha 1 oyunu isə sarı vərəqə limitini keçdiyi üçün buraxacaq.

Beləliklə, hücumçunun La Liqadakı mövsümü başa çatıb. Lakin “Rayo Valyekano” UEFA Konfrans Liqasında mübarizəni davam etdirir.

Xatırladaq ki, daha əvvəl Sequnda Liqasının qapıçılarından biri 13 oyunluq cəza almışdı.