Markos Llorente qidalanma ilə bağlı fikirlərini açıqlayıb - “kalori hesabı psixoloji tələdir”

“Atletiko”nun futbolçusu Markos Llorente qidalanmaya münasibəti barədə fikirlərini bölüşüb.

90deqiqe.Az xəbər verir ki, təcrübəli futbolçu bu barədə sosial şəbəkə hesabında yazıb.

“Əvvəllər mən də kalori sayırdım, yeməyi çəkirdim. Rəqəmlərə aludə olaraq yaşayırdım və düşünürdüm ki, sağlamlıq sadəcə riyazi bir tənlikdir. Bu isə çox kədərli bir asılılıq formasıdır. Mənim üçün kalorilər müasir qidalanma elminin ən böyük psixoloji tələlərindən biridir.

Bizə inandırıblar ki, insan bədəni sadəcə bir kalkulyatordur. Arıqlamaq ‘az yemək və çox hərəkət etmək’ deməkdir. Amma enerji haradan gəldiyindən asılı deyil, əsas odur ki, hesab düzgün çıxsın.

Lakin bədən Excel cədvəli kimi işləmir. O, işıq, təbiət, zaman, emosiyalar, su, günəş və ətraf mühitlə bağlı olan bir orqanizmdir. Bu isə hər şeyi dəyişir.

Eyni 2000 kalorini səhər günəş altında, yaxşı yuxudan sonra yemək, gecə yarısı süni işıq altında, yüksək stress vəziyyətində yeməklə eyni deyil. Məhz buna görə mango meyvəsini səhər günəş altında yemək, gecə serial izləyərkən yeməkdən fərqli təsir göstərir.

İnsanlar stress içində yaşayır, yeməyi çəkir və rəqəmlərə aludə olur. Mən ömrüm boyu yeməyi çəkməyi təsəvvür edə bilmirəm. Çünki əsl sağlamlıq nəzarət obsesiyasından yaranmır”