"Real Madrid"ə "yox" demək mümkün deyildi"

Madrid "Real"ının yeni transferi Bernardu Silva komandaya keçidindən sonra ilk təəssüratlarını bölüşüb.

90deqiqe.Az-ın məlumatına görə, klubun mətbuat xidmətinə açıqlama verən Silva "Real Madrid"də olmaqdan məmnunluğunu ifadə edib.

"Bu, mənim üçün xüsusi andır. Burada olduğum üçün çox xoşbəxtəm. Bu klub haqqında çox danışmağa ehtiyac yoxdur, onun tarixi hər şeyi özü deyir. Bu yola başlamaqdan məmnunam və komandaya qələbələr qazanmaqda kömək etmək istəyirəm. Çünki "Real Madrid" bunu hamıdan yaxşı bacarır", - deyə futbolçu bildirib.

Portuqaliyalı yarımmüdafiəçi Madrid klubundan təklif aldıqdan sonra seçim etməkdə tərəddüd etmədiyini də vurğulayıb.

""Real Madrid"dən təklif gələndə "yox" demək mümkün deyildi. Heç ikinci dəfə düşünmədim. Bu komandaya qarşı dəfələrlə oynamışam və klubun necə böyük olduğunu, "Santyaqo Bernabeu"nun necə möhtəşəm atmosferə malik olduğunu yaxşı bilirəm. Ailəmə yaxın olmaq və oxşar mədəniyyətdə yaşamaq əlbəttə ki, vacibdir. Amma futbol tarixinin ən böyük klubunda oynamaq əsl imtiyazdır", - deyə Silva qeyd edib.

O, ilk məşqlərin kifayət qədər gərgin keçdiyini və komandadakı atmosferdən razı qaldığını bildirib.

"İlk məşq ağır keçdi, yoruldum. Amma komanda yoldaşlarımla tanış olduğum üçün çox sevinirəm. Onların bəzilərinə qarşı əvvəllər dəfələrlə oynamışam. Burada yüksək intensivlik hiss olunur və özümü sanki evimdə hiss edirəm", - deyə Bernardu Silva əlavə edib.

 31 yaşlı futbolçu yeni komandasında Joze Mourinyonun rəhbərliyi altında ilk məşqlərinə də çıxıb.

Daha əvvəl İngiltərənin "Mançester Siti" klubunda çıxış edən portuqaliyalı yarımmüdafiəçi azad agent kimi Madrid təmsilçisinə qoşulub.

Qeyd edək ki, portuqaliyalı futbolçu ötən mövsüm 53 oyunda meydana çıxaraq üç qol vurub və beş məhsuldar ötürmə ilə yadda qalıb.