“Betis” səfərdə “Valensiya”ya qalib gəldi

İspaniya La Liqasının ikinci turunda “Valensiya” doğma meydanda “Betis”i qəbul edib.

 90deqiqe.Az-ın məlumatına görə, qarşılaşmanın ilk hissəsində hər iki komanda hücum futbolu nümayiş etdirərək hesabı açmağa çalışsa da, tərəflərdən heç biri fərqlənə bilməyib. Beləliklə, komandalar fasiləyə qolsuz bərabərliklə yollanıblar.

İkinci hissədə də meydanda ciddi dəyişiklik baş verməyib. Qarşılaşmanın sonlarına qədər azarkeşlər qol gözləsələr də, uzun müddət hesab dəyişməyib.

Lakin matçın son dəqiqələrində qonaqlar fəallıqlarını artırıblar və qurduqları hücum nəticə verib. Fransisko Qarsiyanın ötürməsindən sonra Pablo Qarsiya topu dəqiq zərbə ilə qapıdan keçirərək “Betis”i önə çıxarıb.

“Valensiya” görüşün qalan bölümündə hesabı bərabərləşdirməyə çalışsa da, “Betis” müdafiədə inamlı oynayaraq minimal üstünlüyünü qoruya bilib.

Beləliklə, “Betis” mövsümün ilk iki turunda maksimum nəticə göstərərək xallarının sayını 6-ya çatdırıb. “Valensiya”nın isə iki turdan sonra cəmi 1 xalı var.