“Sevilya” doğma meydanda “Atletiko”ya uduzdu

İspaniya La Liqasının 2026/27 mövsümünün III turunda “Sevilya” doğma meydanda Madrid “Atletiko”sunu qəbul edib.

90deqiqe.Az-ın məlumatına görə, “Ramon Sançes Pisxuan” stadionunda keçirilən qarşılaşma qonaqların 3:1 hesablı qələbəsi ilə başa çatıb.

“Atletiko” artıq 4-cü dəqiqədə hesabı açıb. Aleks Baena fərqlənərək Madrid klubunu önə keçirib.

26-cı dəqiqədə nigeriyalı futbolçu Ademola Lukman “matrasçılar”ın üstünlüyünü iki topa çatdırıb. 33-cü dəqiqədə isə Baena dublunu rəsmiləşdirərək hesabı 3:0 edib.

“Sevilya” ikinci hissədə fərqi azalda bilib. 66-cı dəqiqədə Migel Syerra meydan sahiblərinin yeganə qolunu vurub.

Qeyd edək ki, “Atletiko”nun hücumçusu Xulian Alvares bu qarşılaşmanın iştirak ərizəsinə daxil edilməyib.

Bu qələbədən sonra “Atletiko”nun xalları 7-yə yüksəlib və komanda La Liqanın turnir cədvəlinə başçılıq edir. “Sevilya” isə 6 xalla 5-ci pilləyə geriləyib.