“Barselona” “Alaves”i darmadağın edib

İspaniya La Liqasının 11-ci turunda “Barselona” doğma meydanda “Alaves”i böyük hesabla məğlub edib.

90deqiqe.Az-ın məlumatına görə, “Spotify Kamp Nou” stadionunda keçirilən qarşılaşma Kataloniya təmsilçisinin 6:1 hesablı qələbəsi ilə başa çatıb.

Görüşün baş hakimi Adrian Kordero Veqa olub.

“Barselona”nın heyətində Rafinya 8-ci dəqiqədə hesabı açıb. Fermin Lopes 23-cü dəqiqədə fərqi artırıb. Rafinya 41-ci dəqiqədə dublunu rəsmiləşdirib. Lamin Yamal isə 45+1-ci dəqiqədə fərqlənərək ilk hissənin yekun hesabını müəyyənləşdirib.

İkinci hissədə də üstün oyun nümayiş etdirən meydan sahibləri 64-cü dəqiqədə Lamin Yamalın dublu ilə hesabı 5:0-a çatdırıblar. Entoni Qordon 81-ci dəqiqədə “Barselona”nın altıncı qolunu vurub. “Alaves”in futbolçusu Mariano Dias isə 84-cü dəqiqədə yekun hesabı müəyyənləşdirib – 6:1.

Bu qələbədən sonra 11 oyunda 30 xal toplayan “Barselona” turnir cədvəlinə başçılıq edir. “Alaves” isə 12 xalla yeddinci pillədə qərarlaşıb.

Növbəti matçında “Barselona” noyabrın 8-də səfərdə Madrid “Atletiko”su ilə qarşılaşacaq. “Alaves” isə noyabrın 6-da “Ramon Sançes Pisxuan” stadionunda “Sevilya”nın qonağı olacaq.