Simeone Alvaresin “Atletiko” üçün əhəmiyyətini vurğulayıb

Madrid “Atletiko”sunun baş məşqçisi Dieqo Simeone komandanın hazırkı oyun vəziyyəti və argentinalı hücumçu Xulian Alvaresin çıxışı barədə fikirlərini bölüşüb.

90deqiqe.Az-ın məlumatına görə, mütəxəssis “Marca” nəşrinə açıqlamasında komandanın sıx oyun qrafiki ilə üzləşdiyini və futbolçuların yüksək konsentrasiyasını qorumasının vacibliyini bildirib.

“Biz mövsümün çox çətin və gərgin mərhələsindəyik. Komandadan maksimum konsentrasiya tələb olunur.

Xulian Alvaresə gəlincə, artıq demişəm ki, hücumçular həmişə vurduqları qollarla yaşayırlar. Lakin o, “Atletiko”ya qollardan daha çoxunu verir.

Onun meydandakı zəhməti, pressinq zamanı intensivliyi və komanda yoldaşları naminə özünü qurban verməyə hazır olması bizim taktiki modelimiz üçün əvəzsizdir. O, uyğunlaşmağa davam edir və biz hər gün onun inkişafını görürük.

Hazırda əsas vəzifəmiz qüvvələri düzgün bölüşdürmək və hər bir futbolçunun qarşıdakı oyunlara optimal formada çıxmasını təmin etməkdir”, – deyə Simeone bildirib.