İbrahimoviç və Lukaku arasında münaqişə

İtaliya Kubokunun 1/4 final matçında "İnter"in futbolçusu Romelu Lukaku ilə "Milan"ın hücumçusu Zlatan İbrahimoviç arasında münaqişə baş verib.

Corner.az-ın məlumatına görə, ilk yarının sonlarında "qara-qırmızılar"ın müdafiəçisi Alessio Romanyoli belçikalı hücumçuya qarşı kobudluq edib. Bundan narazı qalan Lukaku Romanyoli və İbrahimoviçlə mübahisəyə girib. Daha sonra mübahisə iki hücumçu arasında davam edib.

39 yaşlı futbolçu özündən 12 yaş kiçik oyunçunu təhqir edib və eyni tərzdə cavabını alıb. Baş hakim hər iki oyunçuya sarı vərəqə göstərib. 58-ci dəqiqədə isə İbrahimoviç kobud oyunu ilə əlaqədar ikinci sarı vərəqə alaraq, meydandan qovulub.

Qeyd edək ki, hesabı 31-ci dəqiqədə Zlatan İbrahimoviç açıb. 71-ci dəqiqədə Romelu Lukaku penaltidən bərabərlik qolunu vurub. 90+7-ci dəqiqədə isə "İnter"in futbolçusu Kristian Eriksen fərqlənərək, "İnter"ə 2:1 hesablı qələbə qazandırıb.