İnter məşqləri dayandırdı, futbolçuların milliyə getməsinə qadağa qoydu

Futbol üzrə İtaliya A Seriyasının 28-ci turu çərçivəsində keçirilməli olan “İnter” – “Sassuolo” matçı təxirə salınıb.

Corner.az xəbər verir ki, buna “İnter”də koronavirusa yeni yoluxma faktlarının qeydə alınması səbəb olub.

Belə ki, ötən gün Milan təmsilçisinin qapıçısı Samir Handanoviçdə koronavirus aşkarlanmışdı. Bu gün isə müdafiəçi Stefan De Vreylə yarımmüdafiəçi Matias Vesinonun COVİD-19 testinin nəticəsi pozitiv çıxıb. Sözügedən futbolçular da evlərində karantinə alınıblar.

Yoluxma sayının artması səbəbindən martın 21-nə qədər “İnter”də kollektiv məşqlər qadağan edilib. Bu üzdən martın 20-də keçirilməli olan “İnter” – “Sassuolo” matçı da təxirə salınıb. Oyunun nə vaxt baş tutacağı bəll deyil.

Bunlar azmış kimi, “İnter”də çıxış edən futbolçuların milli komandalara getməsinə də qadağa qoyulub. Bütün kollektiv martın 22-də təkrar testdən keçiriləcək. Yalnız ondan sonra müvafiq qərarların verilməsi gözlənilir.