Massimiliano Alleqri: Ronaldo Yuventus'da qalmaq istəmir

Portuqaliya millisinin futbolçusu Kriştiano Ronaldo "Yuventus" klubunu tərk etmək istəyir.

Corner.az-ın məlumatına görə, bu barədə Turin təmsilçisinin baş məşqçisi Massimiliano Alleqri açıqlama verib.

"Mən dünən Kriştiano ilə danışdım. O, mənə gəlib artıq "Yuventus" üçün oynmaq istəmədiyini və burada qalmaq niyyətində olmadığını bildirdi. Ronaldo bu gün səhər məşqində iştirak etməyib", - deyə 54 yaşlı mütəxəssis vurğulayıb.

Qeyd edək ki, İngiltərənin "Mançester Siti" klubunun Kriştiano Ronaldoya 2 illik müqavilə qarşılığında illik 15 milyon avro maaş təklif etdiyinə dair xəbərlər yayılıb.