Mourinyo 1000-ə çatdı

“Roma” İtaliya A Seriyasının 3-cü turunda “Sassuolo”ya 2:1 hesabı ilə qalib gəlib.

Corner.az xəbər verir ki, bu qarşılaşma "canavarlar"ın çalışdırıcısı Joze Mourinyo üçün əlamətdar olub. Belə ki, 58 yaşlı mütəxəssis baş məşqçi kimi 1000-ci oyununa çıxıb.

2000-ci ildən məşqçiliyə başlayan portuqaliyalı mütəxəssis geridə qalan 1000 matçda 638 qələbə qazanıb. Mourinyo  204 heç-heçə edib və 158 dəfə də məğlub olub.

Mourinyo karyerası ərzində daha əvvəl Portuqaliyada “Benfika”, “Leyriya”, “Portu”, İngiltərədə “Mançester Yunayted”, “Çelsi”, “Tottenhem”, İtaliyada “İnter”, İspaniyada “Real” kimi klublarda çalışıb. O, Portuqaliya, İngiltərə, İtaliya, İspaniya çempionu olub, Çempionlar Liqası və Avropa Liqasını qazanıb.

Mourinyo bu yay “Roma”ya baş məşqçi təyin olunub.