“Azarkeşlərimizə tarixi bir an yaşatmaq istəyirik”

“Napoli”nin baş məşqçisi Antonio Konte A Seriyasının son turu ilə bağlı fikirlərini bölüşüb. Onun sözlərinə görə, mövsümün nəticələri ən yaxşı komandanı müəyyən edəcək.

90deqiqe.Az xəbər verir ki, təcrübəli mütəxəssis ehtiyat oyunçular skamyasında yer ala bilməyəcəyinə görə üzgün olduğunu bildirib:

"Ehtiyat oyunçular skamyasında ola bilməyəcəyim üçün çox təəssüflənirəm. Belə bir mövsümdən sonra komandama yaxın olmaq istərdim. Amma heyətimə və azarkeşlərin dəstəyinə inanıram. Napoli və azarkeşlərimizə tarixi bir şey vermək üçün böyük məsuliyyət hiss edirik."

Hazırda “Napoli” turnir cədvəlində “İnter”i 1 xal qabaqlayır. Son turda neapollular 14-cü pillədə qərarlaşan “Kalyari” ilə, “İnter” isə 10-cu sıradakı “Komo” ilə qarşılaşacaq. Konte diskvalifikasiya səbəbindən bu qarşılaşmada texniki zonada yer almayacaq.

Qeyd edək ki, “Napoli”nin aktivində üç İtaliya çempionluğu var. Komanda sonuncu dəfə 2023-cü ildə çempionluq sevinci yaşayıb.